الشذوذ يجوز

Posted by Unknown
ايوه يا معلم الشذوذ يجوز ... مش عشان انا عايز كده لا .. لانه فعلا بقى عادى فى مصر
نصيحه لوجه الله خد بالك من عيالك بنات او ولاد وعيهم فهمهم الاطفال بقوا مش طبيعين فى مصر
خد بالك على عيالك ..

الحضانه :
فى اطفال بتبقى فى خمس وست سنين بيتحشروا بالاطفال الى هى عمر 3 سنين
متقفلش الموضوع وترفض تكمله ده حقيقى ... تابع وركز وشوف عيالك نفسيتهم عامله  ايه ..
ومين بيتكلم معاهم بيحبوا ايه ويكرهوا ايه فهمهم مين يجى نحيت جسمهم ومين ميجيش

المجتمع :
الشارع والمصايف فى البحر والنوادى والمدارس كل دى اماكن ممكن يكون فيها التحرش والشذوذ
كتير , خد بالك من ابنك وبنتك عشان نفسيتهم وعشان محدش يجرحهم , المجتمع مبقاش حلو زى زمان

صلى وادعى ليهم من كل قلبك وعلمهم الصلاه عشان ربنا يرحمهم ويرعاهم ..
وعيهم .. هتقولى ازاى هقولك معرفش فى كتب بتتكلم عن الموضوع ده كتير اقرى وافهم ووعى طفلك
باسلوب صح ..
اسئل اهل العلم والمعرفه شيوخ وقساوسه اين كنت مسيحى او مسلم .. اتبع تعاليم دينك فى المواضيع دى كويس

وركز عشان عيالك يطلعوا كويسين .. وياخى مترفض كلامى وتقفل واديله ولو نسبه 1 فى الميه انه صح
واتعامل على كده لعل وعسى ...

وشكرا واحب اقول ان الشذوذ لا يجوز ولكن الناس مش عارفه .. انه اصبح يجوز بكل اسف !!


احاسيس

Posted by Unknown
احـــــــــــــــــــــــــــــــــــــــــــــــــــاسيس
مفيش حد ومش هيكون فى حد معندهوش
من الاحاسيس
لان الاحاسيس دى مولودين بيها دى طبيعه ... كل شخص بيبان جامد وقوى جواه بيبكى
كل شخص صايع ومتشرد وبيتكلم بلغه اساحبى واباشا بجد ومش بيهرج جواه طفل
كل شخص قتل جواه حنيه .. كل شخص اغتصب جواه براءه

كل شخص بيكره جواه حب
كلنا بنشعر باحاسيس

طبيعى ان كتباتى كلها مجنونه فلو بتقول عليا متناقض ومجنون دلوقتى هقولك ماشى
موافق بس فكر معايا حبه واحسبها صح

ايه الظروف الى غيرت الناس .. ليه الطفل لما يتولد بيكون برئ
ازاى الاب بيقتل ابنه والابنه تقتل امها .. وازاى الجد يغتصب احفاده بكل بساطه

ومين هو المسئول عن ده كله ... مدمر الاحاسيس
ابليس ... الشيطان يعنى ... اول شئ بيكسرها الشيطان فى الانسان الشعور والاحساس
فلما يكون الانسان مش بيحس يقدر يعمل اى شئ ويخرب الدنيا
لما الانسان ميحسش .. يقدر يقتل ولا يصعب عليه الى قتله
يقدر يسرق وميهونش ولا يفكر فى الى سرقه الفلوس دى مهمه قد ايه ليه .
لما الانسان يتوه منه الاحساس ... ممكن ينسى ان الى قدامه بيحبه

حتى علاقتنا مع ربنا هى كده بالضبط اول ما الشعور والاحساس الى جوانا بيروح مننا
نبتدى ننساه  ونعمل كل حاجه تريحنا كاشخاص ...................... الاحساس ده نعمه

يارب خلينى احس بيك واحس بكل شخص حوليا لان من غيره مش بشعر انى عايش .

وع راى المثل الى عنده احساس احسن من الى عنده عزبه


هى هى هى هى ( ضحكه رقيعة )

Posted by Unknown
كل مره بعدى قدام الكوافير بسمع ضحك جايب اخر الدنيا وكنت بكبر عادى ستات وبتضحك
 بس كان فى سؤال بيجيلى ,,  ياترى هما مشغليين قناه موجه كوميدى ولا ايه الحكايه ؟
مع ان قناه موجه كوميدى دى غلسه قوى ومش بتضحك اصلا ؟؟
ثم هو فى فالوقت ده حاجه بتضحك بجد اساسا !! عمتا وانا مالى خلينى ف حالى
ويوم ورا يوم  الموضوع كبر فى نفوخى اكتر واكتر
والالحاح الى جوايا عمال ينهش فى عقلى وقلبى ( جو بتاع كتاب ال يعنى بكتب حلو )
 وقررت انى لازم اعرف وقلت لنفسى لازماً وحتماً ولابد
انى اخش اشوف الموضوع جوه عامل كده ليه .....
بس ادخل ازاى و  انا مذكر .. وده كوافير لاى مؤنث وطبعا مكتوب يافطه كل العاملين سيدات
فقررت انى اجند واحده من زمايلى وابعتها تدخل متخفيه فى هيئه واحده ال عايزه تعمل اى حوار 
فى اى حاجه من حاجات البنات ( شعر .. دقن .. حواجب .. الخ .. الخ .. الخ )
تشوف الى بيجرى وتطلع تقولى ايه الى بيحصل ..... بالضبط

وبعد اليوم المحدد فيه اتمام العمليه وبعد ساعه الصفر خرجت وهى منهارة تماماً بعد اقل من ربع ساعه
معرفتش اتلم على البت غيرها بعدها باسبوع .. لما كانت اتخلصت من كل الى شفته والتجربه المره
الى عاشتها ....................................................... وطبعا استجوبتها تحت اللمبه الصفره
الصديقه العزيزه .. س. م . ع . ك
س : ايه الى شفتيه جوه بالضبط ؟
ج : كل البنات بتخش لابسه عبايه وفجاه كله يتقلع ويتبقى شبه بدى وزى بنطلون كده ..

س : وايه سر الضحك المتزايد .. والعالى والسريع و احم الرقيع ..
ج : مش عارفه ليه بالضبط بس بيتوشوشوا ويضحكوا بصوت عالى قوى  لدرجه انى مش بفهم ليه

س : قوليلى سر انك فضلى تغسلى فى هدومك ومنقوعه فى البانيو يومين متواصلين
ج  : عشان كل بنت من دول اول متخلص قلع بتروح مطلعه علبه سجاير وهاتك يا تدخين  وسيجاره فى سيجاره

س : يعنى ايه سجاره فى سجاره ؟؟
ج : يعنى قبل ما السيجاره الى فى الايد اليمين تخلص تكون بتولع واحده تانى بايدها الشمال ..

س : هل فعلا فى قسم للمحجابات .
ج : اه بس ده ريحته غريبه قوى  .. متهيئلى بشمها فى الافراح الى بتكون فى الشارع لما بتتعمل تحت البيت ..

س : تفتكرى انه نوع من انواع المخدرات ؟؟ زى الحشيش ..
ج : انا لما بخش الكوافير بتسطل اصلا معرفش ليه ,, بس تصدق ممكن .

س : هل كل الكوافيرات كده ؟؟
ج :  لا مش كله فى كوافيرات مفهاش كده خالص بس النوعيه دى من البنات منتشرين ...

اوك امضى على اقوالك تعالى خدها يا عسكرى ع الحجز ... اااااااااااا طب متشكرين قوى ومنجلكيش ف حاجه وحشه

اعزائى القراء .. حد عنده كوافير وعايز شاب (انا ) يشتغل فيه




كلام كبير

Posted by Unknown

ان هذا المنبثق فى الدلع المتكفل المنبهر المرتزق سريع البديهة رائعه الاخلاق سريع الغضب و الكلام

يؤدى لطرق مشتته بكثره اللعثمه والدحرجه والكركبة الى ما هو تالى وتالت ومليون لذلك قررت بكل

بساطه اعلان غضبى عن كل ما هو قد مضى من حياتى المتركمه واقولها لمن هو اقوى منى يا من

قتلت فيا الحب والهوا وسلخت قلبى حتى استوى .. منك لله بالقوا ( هى كانت قوى بس عشان القافيه )

انهــــــــــــــــــــــــــــــــــــــــــــــــــــــا قد تكون نهاية الامور والعثور على شئ سقط واختفى انما حينما

حيثما بينما مش فارقه عندى مثلما .. وان كنت فاهم فهما قلبى وعقلى وكونما كبير صغير ولا همنا


احيانا بنكون مش فاهمين نفسنا نهائى ... الناس تسألنا تقولنا مالنا ؟؟

ومفيش رد هنقول ايه ؟؟؟

ولا حاجه ... اصل فعلا مفيش حاجه .. ولا فى حاجه معينه مضيقانا

لكن بقى وبصراحه جوانا حاجه خناقنا

عمرك حسيت بكده لو حسيت بكده تبقى انسان

عادى انسان طبيعى يعنى .. بيحس زى اى انسان بيحس

ومن هنا جتلى فكره عشان اكتب فيها ... اصل انا زهقان

ومش لاقى حاجه اكتب فيها فكتبت كل الى فات لحد ما القى معلومه مفيده

فى وسط الكلام اتكلم عنها وهى الاحاسيس ... بس مش هتكلم عنها النهارده

لكن فى يوم تانى لانى مشغول دلوقتى يلا ..... اسيبكوا ف خير



محزوق مزنوق مرزوق زقزوق

Posted by Unknown

زقزوق اتجوز زقزوقه

فجابوا مرزوق ومرزوقه وعملوا فرح كبير واخدوا طشت بيطل على (view )  رائع

وبعد كام اسبوع جابوا مزنوق ومزنوقه وديدو وحميدو وبلبع ولعلع
وحسب الاسامى بالترتيب اتجوزوا واستمر الحال
لحد ما وصلوا كعدد 42 زقزق من سلاله الزقزوق الكبير
بغض النظر عن كيانهم ايه او هما من عائلة ايه وشغل الاحياء ده
 احنا عايشين 43 روح فى اوضه واحده .. عزيزى القارى متتصدمش فى مصر هنا

 فى اسر كامله بتعيش على رصيف واحد مش اوضه واحده الحمد لله على كل

 حال .. كل زقزق يبوس ايديه ورجليه وش وضهر ..
نرجع تانى لشركائى  ف حجرتى المتواضعه
النوع : هامستر .... طبعا برئت و احتمال تكون لطمت واول تعليق بتقوله مش

 هيخرج عن التعليقات دى ...
هامستر .. دا احنا بنضربه بالشبشب
ايه القرف ده ..
هاتلك كلب ينفعك ..
سمعك .. سمعك يا الى بتقول عليا انى نايتى وكوكو
ده طبعا لو كنت من الجنس الخشن
اما الناعم خد عندك ....
Wow sooooo cute
مش ممكن يا نانوس عين امه
فااااااااااااااااااااااااااااااااااااااااااااااار وصويط وكده
******
شكرا خلصتوا تريقه ؟؟
دلوقتى بقى سيبونى اتكلم عنهم عيله زقزق الكبير
مش فيران دول ها م س ت ر
والهامستر يختلف عن الفار تمام الاختلاف
اولا كتكوين جسدى ...
الفار الاسود بتعنا عنده اربع صوابع وره ف رجله وتلاته قدام فى ايديه
الهامستر العكس عنده خمسه وره وفى ايديه اربع صوابع
الفار الاسود يقدر ينط زى العفريت ويتسلق اجدعها حيطه حتى ولو ناعمه عادى جدا بيتدرب كويس ..
الهامستر لو رقص عشره بلدى ميقدرش يرفع رجليه الاتنين فى وقت واحد من

الارض غشان يعرف ينط اصلا ولو وقع من مكان بيزيد عن متر ممكن يتشل او

يموت ,
الفار الاسود مناعته قويه جدا ممكن يجيله مرض زى الطاعون فما يمتش منه لكن

ينقل المرض واحنا الى نموت
الهامستر لو جاله برد يموت خلال ساعات قليله جدا ,
الفار الاسود غدار بطبعه ومش اليف
الهامستر عبيط زى الطفل الساذج,
الفار الاسود بياكل اى اكل
الهامستر لو اديتله كنتلوب مثلا بياكله كله ويسيب القشر وكذلك البطيخ طبعا بياكل

 الشيبسى وبيموت فيه .. والتفاح والخيار وبيموت فى الكابوتشى والبسكويت ..
الهامستر وفى جدا اكتر من الكلب يمكن الكلب بيفهم اكتر من الهامستر
لكن افعال الهامستر رهيبه جدا الفيديو ده بيشرح كل كلمه نفسى اقولها عنهم

شوفوه واحكموا على زقزوق وعيلته ..


احب اقول دلوقتى لصاحبى وانتيمى الهامستر احسن من عشره من عينتك
واحب اقول لزقزوق انا اتشرفت انى اتعاملت مع حد زيك J


Copyright © 2009 يا حنين All rights reserved. Theme by Laptop Geek. | Bloggerized by FalconHive.