يا ريتها مقلعت

Posted by Unknown


انا : سلاموا عليكوا
الراجل : وعليكوا السلام ورحمه الله وبركاته
انا : لو سمحت يا حج عايز ادخل اقطع تذكره منين ؟
الراجل : الشباك هناك اهو يا بنى .
انا : متشكر قوى يا حج ربنا يباركك
الراجل : عفوا يا بنى يحفظك يا حبيبى .
انا : (فى سرى ) قد ايه الراجل ده محترم وراجل كبير وزى الفل
الكاشير : كام تذكره .؟؟
انا : تذكره واحده لو سمحت .
الكاشير : قوى قوى ... اتنين جنيه
انا : ياه القلعه عمرها ما هتلبس طول ماهما بياخدوا تذاكر تمنها قليل قوى ..
فعلا اخيرا مصر فيها حاجه حلوه ورخيصه ..
وجالى شوشو بصوت غريب من حوليا بيقولى .. المفروض تخش ببلاش ده المفروض  ده مبنى هتخشه بفلوس ..
انا : استغفر الله العظيم متفكك منى يا عم شيطان انت دول برضه شغالين يعنى الدوله هتجيب منين فلوس لكل العمال دول
والنظافه والرعايه للمكان لالالا انت بتهرج فكك منى ..
الشيطان : لالا مش هفكنى مش بيخدوا منك ضرايب عشان يعملوا ده هتدفع مرتين .. ليه شوف كام حاجه بتدفع فيها ؟؟؟ يرضى مين ده
وفجاه سمعت صوت عزب وزى الفل
الراجل الكبير : التذاكر يا بنى .
انا : اتفضل يا حج ادى التذاكر
فجاه صوت الشيطان جيه بصوت اوحش منه تقريبا واحد صاحبه ...
الشيطان 2 : انت بتهرج قاطع تذكره باتنين جنيه وانت شايل حامل ..
وبعد التاكد من الموضوع  فهمت وتيقنت واتاكدت وعرفت ان الى بيقول كده مكنش الشيطان ولا جان ولا مارد ولا عفريت
ده الراجل الطيب  ... او كان طيب
انا : ايه ياحج فيه ايه دا تراى بود للكاميرا عشان انا مصور ..
الراجل : منا عارف يا استاذ مينفعش كده لازم تقطع تذكره ليه ..
انا : اقطع تذكره لمين يا حج بقولك ده تراى بود .. مش واحد صاحبى
الراجل : لازم تقطع يا بنى انا عبد المامور يا بنى متودنيش فى داهيه .. ( صوته بقى حنين تانى )
انا : (فى سرى ) يا راجل خضتنى مش تقول كده من الصبح ( بصوت عالى ) انا مرداش ازيتك يا حج حاضر هقطع عنيا
الراجل : تشكر يا عسل ربنا يحرسك ..
الكاشير : ايوه يا باشا فى حاجه ؟؟
انا : عايز تذكره للتراى بود ده .
الكاشير :الحامل .
انا : ماشى حامل حامل هات بس انت التذكره ..
راح الكاشير ساحب من بوقه قنبله وحدفها عليا  ... القنبله متمثله فى كلمه  .... " عشين جنيه "
انا : تن ترارا تن طن . عشين مين ؟؟
الكاشير : عشين جنيه للحامل ..
انا : يا عم اعتبره ولد  هات تذكره باتنين جنيه زى وخلاص ..
الكاشير : مينفعش يا استاذ مينفعش ..
الراجل  الكبير : ياعم متتعبناش بقى هتدفع عشرين جنيه تذكره للحامل ولالا ؟؟
انا : طب انتوا بتقفلوا الساعه كام ؟؟
الراجل : كمان نص ساعه ..
انا : ينهار اسوح هدفع عشرين جنيه للتراى وانا اتنين جنيه ومش هستفاد منه غير نص ساعه .
طب ينفع اسيبه معاك يا حج
الراجل : لا مينفعش
انا : طب ينفع اخش بيه ومصورش بيه خالص يا حج
الراجل : لا مينفعش
انا : طب ينفع طيب  انى ...
الراجل : ياعم خلص زهقتنى بقى هتدخل ولالا ؟؟
انا  : ( فى سرى ) ابوك لابو التصوير لابو الحامل (وبابتسامه بارده جدا )
الراجل : بتضحك كده ليه هتدخل ولالا ... اقولك انا هحلها حطه فى العربيه ..
انا : انا جاى بالمكيروباص ..
الراجل : ماشاء الله معاك ميكروباص .. طب متحط الحامل فيه ..
انا : ( هنا بقى مقدرتش استحمل ) ياعم الحج قلتلك جاى ف ميكروباص وعمو بتاع الميكروباص السواق مشى راح بيته ... فاهمنى
الراجل : لا حول ولا قوه الا بالله
انا : ايه يا حج هى الحاله خطيره قوى كده ؟؟
الراجل : لا يا بنى بس عايز اقولك ان الوقت خلص و بيفضوا القلعه .. ومش هينفع تخش ..
طبعا ......................................................................................... النهاية
عفوا مش هقول الباقى لاسباب يعجز سنانى انها تقولها  وزى ما قلت
النهايـــــــــــــــــــــــــــــــــــــــــــــــــــــــــــــــــــــــــــــــــــــــة



Copyright © 2009 يا حنين All rights reserved. Theme by Laptop Geek. | Bloggerized by FalconHive.